منة الله .. طفله جميله شوفتها أول مره و هى عندها 4 شهور من حوالى سنه , وقتها اللى جابهالى ناس من أهل الخير و حكولى وقتها ان ابوها من اسبوعين توفى الى رحمه الله فى حادث سياره و بعد وفاته بيومين يشاء الله ان امها تمرض , و من دكتور لدكتور لحد ما اتضح انها عندها سرطان فى الدم و ابتدت علاج كيماوى فى المستشفى
طبعا كان لازم الطفله أبدا لها غذاء باللبن البديل للبن الأم بالأضافه لان البنت كان حالتها الصحيه العامه متدهوره نتيجة عدم العنايه الكافيه بيها للظروف اللى حصلت
المهم , البنت كانت بتابع عندى كل فتره و كانت بفضل الله بتكبر و تتطور على احسن ما يكون و ابتدت تتكلم و تلعب و بقت تجيلى كمان مع مامتها بعد ما تحسنت صحة الام بالعلاج
امبارح جاتلى و هى مريضه بس مش مع مامتها , سألت عن أمها قالولى انها توفيت الى رحمة الله من تلات ايام بعد رجوع المرض لها و دخولها المستشفى و تدهور حالتها فى خلال اسبوع
البنت بالرغم من مرضها ضحكت لما شافتنى و سلمت عليا لكن حسيت فيها بحزن يمكن مش عارفه تعبر عنه لأنها لسه طفله مش فاهمه يعنى ايه موت و يمكن انا اللى تخيلت ده
سرحت و قلت سبحان الله و لا حول و لا قوة الا بالله
تخيلت هذا الرجل فى بدايه حياته هو و زوجته و يجيلهم طفله جميله تديهم أمل فى الحياه , لكن يشاء المولى العزيز القدير ان الاب يموت و بعده فى اقل من سنه كمان الام تموت و تبقى الطفله البريئه يتيمه الاب و الام لكن كأنها استمرار لحياتهم فى الدنيا على الارض شايله فى خلاياها نص الصفات من الاب و النص التانى من الام
فعلا .. سبحان من له الدوام الحى الذى لا يموت
