كل ما يجى رمضان بشوف حاجات و بلاقى حاجات بتحصل نفسى يجى رمضان الجاى متكونش موجوده 

 

  الموضه الجديده اللى طلعت علينا فى وسائل الاعلام و هى جمله ( رمضان 2006 ) الحكايه دى بقالها كام سنه و مش عارف مين اللى بدعها بس هو انسان مخه ضلمه و عايز يفصل المسلمين  عن تاريخهم الهجرى , لو سألت عشره فى مصر احنا سنه كام هجريه حتلاقى اكتر من نصهم مش عارفين و شويه ممكن يقولوا يعنى ايه هجريه !! و قليل جدا اللى حيعرفوا الاجابة

 

 كميات الاكل الرهيبه اللى الناس بتشتريها زى ما يكونوا محرومين طول السنه مع ان المفروض ان من فوايد الصيام  للجسم انه يرتاح شويه من الاكل شهر فى السنه

 

و انا رايح شغلى بالليل بعد صلاه التراويح بلاقى الناس على القهاوى  امم و هات يا لعب طاوله و دومانو و كوتشينه وكل شحط من دول قاعد و ف بقه شيشه و الغريب ان فيه منهم بيكون لسه مخلص صلاه التراويح و

بعدها رايح يكمل القعده على القهوه !!   منتهى الانفصام فى التصرفات

 

البنات و الستات اللى مش محجبات تلاقى الواحده من دول رمضان جه و على طول تلبس الحجاب و طبعا مفيش

مكياج و الذى منه , نقول عال الهدايه من الله سبحانه و تعالى, بس على اول يوم العيد و ترجع ريما لعادتها القديمه الحجاب مفيش و الشعر اصفر و المكياج بقع بقع

 

كلمه غريبه كتير بسمعها من بعض الناس : متكلمنيش و متنرفزنيش عشان انا صايم , مع ان مفروض الصيام

يخلى الناس اكثر هدوء و سكينه و حب

 

النميمه و سيره الناس عاده مصريه اصيله لكن تلاقيهم فى رمضان بعد ما يخلصوا الكورس المتين يقولوا : ياعم دع الخلق للخالق اللهم انى صائم  , قال يعنى كده خلاص مفيش مشكله

 

نفسى نفهم معنى الصيام اكتر لانه مش امتناع عن الاكل و الشرب بس لكن ده امتناع عن كل ما يكره الله و محاوله عمل كل ما يحب الله و ده شهر فى السنه يا ريت لو يستمر

 

ادعوك ربى يا رحمن

ان ترحمنى برحمتك رحمه واسعه

 

ادعوك ربى يا غفار

ان تغفر لى ذنوبى و خطاياى

 

ادعوك ربى يا ستار

ان تسترنى فى الدنيا و يوم العرض عليك

 

ادعوك ربى يا كريم

ان تكرمنى بالنظر اليك فى الاخره

 

ادعوك ربى يا وهاب

ان تهبنى ايمانا و يقينا لا ينقص

 

اللهم اجعل لى فى قلبى نورا

و فى سمعى نورا

و فى بصرى نورا

و عن يمينى نورا

و عن شمالى نورا

و بين يدى نورا

و من خلفى نورا

و من فوقى نورا

و من تحتى نورا

اللهم زدنى نورا

و اعطنى نورا

و اجعل لى نورا

يا ارحم الراحمين

يا ارحم الراحمين

يا ارحم الراحمين

 

سبحان الله كل ما أحس ان الدنيا مضلمه ف وشى الاقيها ادامى , وجه زى الملاك و ضحكه منوره , تجرى عليا  اول ماتشوفنى الاعبها و اضحك معاها.النهارده لقيتها جايالى زى ماتكون عارفه انى محتاج اشوفها زى ماهى محتاجالى

نور خالد , دا اسمها , اتولدت بمرض فى الغده فوق الكلويه و عانت كتير اول كام شهر من عمرها

 كان علاجها انها تمشى على ادويه مشاكلها متقلش عن المرض نفسه , بس سبحان الله طلعت من الازمه بدون اضرار تذكر

لما كان عندها سنه جالها التهاب فى المخ عملها استسقاء فى الدماغ دخلت اوضه العمليات و ركبت صمام من المخ للبطن و لتانى مره سبحان الله طلعت من المرض ده بدون اى اعاقه

لما كان عمرها حوالى سنه و نص و للاسف بسبب تطعيم غلط مكانش مفروض تاخده  جالها فيروس شلل الاطفال لانها كانت بتاخد الادويه بتاعه المرض الاولانى و دى بتهبط المناعه

برضه سبحان الله بعد اقل من سته اشهر كانت بفضل الله بتحرك رجليها كويس و مسابش المرض فى رجلها اى اثر تقريبا

برغم كل الالم اللى كانت بتعانيها كنت كل ما اشوفها الاقيها بتضحك و كنت اقول لنفسى بقى الدنيا مضلمه ف وشك طب شوف نور اهى بتضحك ازاى

لقيتنى لما بشوفها انسى كل الم و احس بتفاؤل ان بكره احلى من النهارده و اشوف نور جوه الضلمه ,,,نور خالد